Les mots surlignés font l'objet d'une note
1Monseigneur, jay receu la lettre quil vous a pleu mescrire de Laval
2ce jourdhuy, ensemble celle que monsieur d’Eybens vous escript de
3Paris du VIIIe de ce moys, lesquelles jay faict veoir à monsieur
4le presidant ; la lecture desquelles que je luy ay faicte, luy a
5servy, comme il ma dict, dune bonne medecyne, mesmes de la convallessance
6de monsieur de Laval par lapostille escritte de votre main,
7et du regret que faisoient de luy en France ses bons seigneurs
8et amys, pansant lavoir perdu, ainsy que vous escrit ledit sieur d’Eybens
9par sadite lettre que je vous renvoie. Je loue Dieu quilz laient regretté
10vif. Quant à sa santé, elle est maintenant meilleure quelle na
11esté depuis huict ou neuf jours, naient plus que ung peu de flux
12de ventre qui luy donna pour prendre congé pour ceste foys une
13mauvaise tranchée ier au soir qui dura une heure, et depuis ne
14sen est santi. Il reprent le goust des viandes, mais non du
15vin quil trouve encores amer. Il ne dort que par intervalles,
16tantost une heure, tantost deux. Monsieur maistre Nicollas nous
17asseure de sa santé de laquelle il a bien grant besoing pour
18se reffaire ung peu, estant bien mègre. Il dellibère se remuer
19ung de ces jours à La Tresorerie et y demeurer trois ou quatre jours
20et puis prendre lair des champs à St Jehan de Moyren. Il
21me semble que celluy du Thouvet ou d’Avallon seroit aussy bon.
22Monseigneur, après mestre très humblement recommandé à vostre bonne grace,
23je prie Dieu quil vous aye en la sienne. De Grenoble, ce XVIe aoust
241572 de
25Vostre très humble et très obeissant serviteur
26de Bazemont, abbé d’Aiguebelle